منتی است سرود گونه در" اعلام تحصن ازسوی احزاب کردستان ایران و عدامِ همراهی آن در بلوچستان و گلمندی از جنابِ مولوی عبدالحمید" در همکاری از این مسئله‌ی مهم، باوجودِ جمعه‌ی خونین که جهانی شد و اعدامها در بلوچستان که نه تنها در سطحِ کشور که در جهان نیز در صدرجدولِ اعدماه قرار دارد،چونکه این نقدِنثرگونه‌ِی بلوچی، ِموردِ حمایتِ نیروهای مترقی قرار گرفته است، بجاست که در به پیش نیز انعکاس داده شود 
با سپاس ازیز دادیار

په همایان که چَمزاهرا، وتی چلیم کشّی و باپوری شپنندێن مهپلان، همراه گۆن جی سمین ترزێن  ساز و زێملان و کمالانێن وش الهانیان، دوکۆنڈیَ شاکارنت ودستے په ڈَالاشاهێن برۆتانَ جننت و پانگرّێن بتلان په دژمنانَ پِّرێننت که:
کۆهن بلۆچانی کلات، انبارش ناراهێن گرنت، آپش زئیانی چمّگ اَنت، آپوارش پیشّی کُنڈئواَنت سرجاهش سنگ اَنت نیلّنگێن   بۆرش سپتێن چبّئواَنت  بۆپش هما سبزێن سِک اَنت، په دژمنان نێشَ درشنت، آ انچشێن کارَ کننت:
هیکّا کتگ گۆن ارزُنا، گرکان گۆن سیه مودێن بُزان، رشّا گۆن کۆهێن جنترا، گرمێن لوار گۆن چلڑا.
هۆن بلۆچانی تان دوسد سال اِنت، بچ دو بر پێداگَ نیت ماتان و کئولان بگا بئولَ کننت  
نون گئیرتئے باگا که رسنت، زبانش انچۆ للّ اِنت که ملکئے ورنایانی پاهئوئے هساب و رکمش چه سجّهێنان سراِنت، ناموس بے سرّ کرتگ اَنت و نون په یک ادناێن گالے که "هۆنیا بگوَشئت:
اگن گێشتر بکُشئے، جنگَ نکنێن! بله "کارا نرئوێن، دکانان بندَ کنێن وماتانی بانڈُما نندێن."
چے بگوَشان که همے گونڈێن "هُکوکِ بشری گپّئے" گوَشگا،  زهرگش ترکتگ  و هارێن زبانش مان دپا للّ اِنت ؟!
گۆن همے دێم سیاهیا، وتی گوات گپتگێن هئیال و پوتّارێن زبانا، مان شێرکُشێن چاکر و میرێن گوهرامئے بلۆچی دریاێن دلا وتا جان شۆدَ کننت، هۆتێن همّلئے کِردانی نیلّێن زرا اژناگَ گرنت، شهمیرێن دۆدائے سُهرێن گرماپئے سرا وت ستاییا گرک اَنت، میرێن کمبرئے سدێچئے کنڈگا ملّانَ تچنت. بله  وهدے که چه آ بنگ و چنڈویی و چمجهلی مهپلان که درَ بنت،  نون دگه نه چاکرئے ائولادَ بنت و نه و گهرامئے دلئے دلبند و نانکه تپتان و گنداوگئے نامش اشکتگ، نه هم همّلئے تێسێن سنگرّ و نه دۆدائے گرماپێن پِڑ و نه میر کمبرئے سدیچێن کنڈگ و نه جیندهانئے کڈی بندێن مرکئے جاگه و نه هسئین هانئے زمینگرێن زهم  و شمشانێن سنگر و نه  برام هانئے دِزّکئے ٹولّک و نه شصت مڑادارێن دانشگاهی سوری ورنایانی پاهئو و نه یک سد و بێست گُسْل گپتگێن بلۆچانی یکجاهێن کۆش مان جمهئے هۆنێن سنگرا، نه هم یاسِرێن دۆدا سپاتانی آ سهُرێن پِڑ و نانکه هر سباهیگێن پاهئو داتگێن ورنایانی هلتۆسیانی هئیالا، مان دارانی سرا هر رۆچ!
جی! اے مهپلی سهُرچمّێن بلۆچ،زانئے؟  پکّا اگلئے واجه اَنت میرێن، که یکّے وتا گۆن سید الی بازارا  نپرّێننت! 
لابُد، "بے اگلیا" دادشاهێن مردانی کۆپگا لڈنت و "اهمکیا" نمیرانێن یاسرانی کۆپگا هِلنت 
جیِ آکلێن میران اَنت اے مزن اندێش.
"واجها، دینئے هر جمه کندان    مِنبرئے بُرزادا کننت سالۆنک
2
بلی تان دردستش بکنت بلکێن                         کیامتئےسکّی سۆریان رۆچے.
بله نون او یلێن آکل پێشگێن ٹلّان!:
من شمئے اے ڈئولێن بلۆچّیئے           چادرا بے ننگێن  بزان نئیلان
مان وتی جاڑێن کۆپگان و رئون       مان دگه  بے نامێن دِه و ڈێهےِ
چه شمئے اے ڈئولێن بلۆچیا      سد سراِنت بهیایی  په من پکّا
هر چے من گوشتگ په مزاران زی    نون پشۆمان آن چه شمئے دستا
لال منی چرّۆکێن زبان باتێن
گۆن شما زندگ مرتگێنان نون              نام بگیپت میرێن آ بلۆچانی.
من درآن مرچی چا بلۆچان که               تۆلگی ترسش مان دلا نِشتگ
او یلێن دینی مئولوی یاد کن                   تئو بلۆچانی هۆنئے چاگردا
                         مان جمه هۆنێنا، "وکیل" بوتئے
نون اگن گۆشا هاکمئے زِلّێن            سادگێن اے گالا مپرّێنئئے
هُکم اگن "اێدامئے" مبیت باندا          بند مان هراَدلئے کۆٹیان مئیگا
جنگ ترێن مئے واکَ نبیت مرچی        الّمـا ننــــدێن کُـــڈلان تنکّێـن 
                    "دست چه هر کارو کاسبی کشّێن"
او منی ملکئے مسترێن  واجه!
کمکێن اے گپا اگن بند بیێت          تئیی زبان هارێن مان دپا درّێن
تئو منا رمبێنتگ بزان مرچی         چــــه  بلـــــۆچیئے گلشنێن پَلّا
نون منی آه و بزّگێن اُهبال          تئیی بزان کِنگێن گردنئے باراِنت.
گوَشتگش داناێن بله جلّان
زَر اگن گواریت  گۆن هکیریّا
آسمان گێجات بستگێن هئوران.

ازیز دادیار23 جنوری2025